「隱...隱...隱...隱世小店，生蠔只係18蚊」
介紹返喺坑口村呢間新開唔夠一星期，名為「隱」既日式居酒屋。本身坑口村已經係食肆林立，有西餐、中餐、泰國菜同甜品，如果識得捐窿捐罅搵嘢食既朋友，可能都已經去過呢度。
不過，我今次真係食左頭啖湯，因為呢間「隱」既日式居酒屋只係開左六日，而且佢位於坑口村既巷入面，門面係封閉式，門口只掛左個隱字門牌喺度，行過都未必知道原來係一間居酒屋。之所以名為「隱」，唔知係咪就係呢個意思呢？
打開餐牌第一頁，即見有5款生蠔，價錢由$18至28蚊，絕對抵食。本來我想一次過試晒5款生蠔，點知佢生意太好，只係淨返三款，我咁鐘意食蠔，梗係叫晒啦。
右：法國Fine De Claire （creamy, 少少咸，唔重海水味）
中：塔斯馬尼亞Tasmania （爽，少甜）
左：澳洲哥芬灣Coffin Bay（多肉，爽，淡口）
食既次序當然係淡至濃，我會由左邊Coffin Bay食起，最尾先食法國。
刺身方面，我揀左廚師精選拼盤（$298），最出色係牡丹蝦，鮮甜爽口，值得回味，帶子三文魚都係鮮甜有水準。
居酒屋當然唔少得燒物啦，入得居酒屋，大家都會叫幾串燒物飲杯酒傾下計。佢地既營業時間係去到半夜一點，有時夜晚晚想搵朋友食下嘢吹下水，除左糖水舖同酒吧，不妨可以考慮下去居酒屋。
介紹住咁多先，個燒鮑魚係期間限定，想食既話，可以先打去舖頭問下有無貨先。
地址：將軍澳坑口村6A地下（到左坑口村個大牌坊，行入去第一個巷左轉就會見到）
訂座電話：2311 7900
營業時間：12:00-15:00/ 18:00-01:00
Search